As entidades de xestión de propiedade intelectual (para coñecer que entidades de xestión operan preme nesta ligazón, para coñecer que operadores de xestión independentes operan preme nesta ligazón) dedícanse á xestión de dereitos de explotación e outros de carácter patrimonial, por conta e no interese de autoras, autores e outros titulares de dereitos de propiedade intelectual.
Esta xestión pódena realizar en nome propio, a respecto dos seus socios ou en nome alleo, cando actúan en representación de entidades de xestión estranxeiras.
A Lei de Propiedade Intelectual establece obrigas ás entidades de xestión colectiva e aos operadores independentes, a respecto do contrato e da recadación. Tamén esixe a concesión de autorizacións non-exclusivas e a transparencia na información. Ademais, regula novas obrigas na concesión de licenzas multiterritoriais en liña.
O CONTRATO
O contrato outorga ás entidades de xestión a tarefa de xestionar no teu nome os teus dereitos exclusivos
- O contrato é voluntario.
- Só se aplica a dereitos exclusivos.
- Á entidade de xestión non lle fai falta que asines un contrato para a xestión dos teus dereitos non-exclusivos. Tampouco para a recadación dos dereitos compensatorios.
- O contrato ten unha duración de 3 anos. Ao finalizar este período podes renovalo de ano en ano.
- O contrato pódese revogar (Queres coñecer as opcións de revogación?).
- O contrato asínase para cada tipo de dereitos, non se pode asinar para todos os dereitos nin para xestionar obra futura.
- Asínase para territorios concretos.
- A sinatura do contrato dáche unha serie de dereitos como membro da entidade de xestión (Queres saber que dereitos tes como socia/o?).
É totalmente compatible a autoxestión ou xestión individual dos dereitos exclusivos coa xestión colectiva obrigatoria dos dereitos non-exclusivos e co cobramento dos dereitos compensatorios.
AS LICENZAS
- A entidade de xestión ten a obriga de conceder licenzas a usuarios que utilicen obras creativas na súa actividade económica. Infórmate aquí dos principios aplicables á súa xestión
- Deben informar dos dereitos que están xestionando, das súas tarifas, do seu repertorio de obras e artistas, e das formas de pagamento.
- Atendendo ao uso efectivo, pagarase polo número de horas (horario no que un bar está aberto ao público) ou o número de usuarios que realicen a actividade (número de persoas que reciben clases de baile).
- A intensidade e relevancia do uso: porque non é o mesmo que se escoite música nunha perruquería, onde o uso é secundario e non é a actividade principal, ca nunha discoteca, onde a música é un elemento principal da actividade económica.
- O volume do repertorio: unha entidade de xestión con máis anos de funcionamento e máis repertorio pode ter tarifas máis elevadas.
- Os ingresos económicos obtidos pola explotación do repertorio: porque non é o mesmo facer un espectáculo musical nunha voda ca usar un fío musical nun restaurante.
- O valor económico do servizo que realiza a entidade de xestión: unha entidade con máis anos de funcionamento e máis repertorio pode ter tarifas máis elevadas.
- As tarifas doutras entidades de xestión en territorio europeo: unha entidade europea pode ser referencia; aínda que en Europa cumpren coa directiva, por que aquí non?
- Teñen a obriga de ASINAR ACORDOS SECTORIAIS con asociacións empresariais representativas.
A RECADACIÓN E A REPARTICIÓN
A entidade de xestión ten a obriga de repartir as cantidades recadadas polo cobramento de licenzas exclusivas, licenzas non-exclusivas e dereitos compensatorios.
Aínda que non sexas socia/o, a entidade de xestión está obrigada a xestionar no teu nome os dereitos non-exclusivos e os dereitos compensatorios.
- A entidade de xestión ten a obriga de repartir o diñeiro recadado con criterios obxectivos e razoables.
- Pode aplicar descontos especiais, por exemplo, a asociacións sen ánimo de lucro, ou destinar parte da devandita recadación a fins asistenciais, sociais e culturais.
- A recadación é obrigatoria en licenzas non-exclusivas, tanto para autoras/es socias/os como para non-socias/os.
- Ten a obriga de identificar e localizar autoras/es non-socias/os; se non es membro, podes reclamar nos 5 anos seguintes ao da recadación.
- Algunhas entidades de xestión teñen a obriga de recadar polos dereitos compensatorios.
TRANSPARENCIA… e máis transparencia
A entidade de xestión ten a obriga de facilitar información na súa web ás persoas socias, ás non-socias e a outras entidades. É transparente a túa entidade?
A entidade de xestión ten a obriga de facilitar a seguinte información:
- Datos dos titulares que o autorizasen
- Dereitos recadados
- Importes aboados
- Deducións aplicables
- Dereitos pendentes de pagamento
- Tipos de creacións que xestiona
- Tipos de dereitos a xestionar
- Territorios de xestión
E está obrigada a publicar na súa web a seguinte información:
- Estatutos sociais
- Contas anuais
- Informe anual de xestión
- Informe anual de transparencia
- Órganos de representación e dirección, e retribucións
- Acordos sectoriais asinados con asociacións de usuarias/os (publicados aos 10 días da súa sinatura)
- Tarifas xerais completas e vixentes
- Acordos con outras entidades de xestión
- O repertorio da entidade de xestión
- O regulamento aplicable á repartición de dereitos
- Os descontos de xestión e doutro tipo deducibles da cantidade obxecto de repartición
- Listaxe de obras e prestacións non-aboadas
- Política xeral de uso dos importes non-aboados
- Sistema para as queixas e reclamacións
LICENZAS MUSICAIS MULTITERRITORIAIS
A entidade de xestión ten a obriga de negociar cos provedores en liña de obras musicais (ligazón á listaxe de provedores) unhas tarifas equitativas e razoables, consonte criterios concretos.